Dangariakan.. kisah baandi-andi
Intingan wan Dayuhan, nang disuruh umanya, manjaga pahumaan,
Banih sudah manguning, pipit banyak mamakan,
Sambil mamburu pipit, badua bapusutan
Hari bamula sanja, kadap samun di huma, badua takutanan
Kada saapa, lalu datang Ni Yaksa
Pamakan manusia, awaknya panjang basar, sapuhun kariwaya,
Muntungnya cawah banar, kaya kawah balanga,
Rambut banyak bakutu, halilipan wan kala
Mula handak mamakan, apa akal Intingan, badua bapantunan
Uh kaka uh kiki, banih kita dimakan pipit uh kaka
Anai-anai bahindik-hindik uh ading ulat bulu nang mamutiki
Ni Yaksa, Ni Yaksa, nang bungas langkar lagi pambarian
Kami pang rila dimakan hampian, mun dibari habu halaban
Dayuhan mamusuti, dibawa barabahan
Sambil bakakutuan, Ni Yaksa kanyamanan,
Lalu pang taguringan, disimbur dimatanya, awan habu halaban,
Raksasa kalimpanan, bakuriak kapadihan
Intingan wan Dayuhan, hancap basambunyian,
Di pinggir baruh dalam
Ni Yaksa jarunjungan, matanya kabur bukah manyasahi
Tacabur di baruh balalu mati, badua barami-rami